عزيزي الموظف الإنسان، ضغوط العمل مش سايبة حد وروتينية ومفيهاش رحمة ومن كتر الدوشة بننسى معنى كلمة “إجازة” وبيعتبرها الرياديين وأصحاب الأعمال الأموال رفاهية ليست فى محلها وبنسمع كتير كلمات زي ” أنتوا مبتشتغلوش زيي ليه ؟” كل صاحب شغل للأسف عاوز نسخ منه في الشغل لكن بدون مقابل.
تصدق أن فيه موظفين بيتفاخروا أنهم أشتغلوا سنين طويلة من غير إجازة واحدة أو ن غير استهلاك رصيد أجازاته مع أن دا مؤشر خطير على وجود خلل نفسي وصحي في اللي بيقول الكلام دا.
اليوم وبمناسبة الجمعة هقولك 7 فوايد للأجازة.
- الإجازة بتقلل الإجهاد وبتقلل الشعور بالإرهاق من ضغوط الشغل وبتساعدك كمان على رؤية الحياة من حواليك بوضوح وتفهم إزاي توازن بين العمل والحياة.
- الإجازة مفيدة للصحة الجسدية ، على حسب دراسة عملتها جامعة ولاية نيويورك فى أوسويغو بعد مسح بين 12 ألف شخص ، اكتشف الباحثون أن الأشخاص الذين يذهبون فى عطلة تقل بينهم مخاطر الإصابة بالسرطان بنسبة 20%.
- تساعد الإجازة على تحسين الإنتاجية فى العمل لأنك هترجع للشغل أكثر نشاطًا وإيجابية بعكس لو كان الشغل طول اليوم وطول الأسبوع وصبح وبليل وفي الأعياد.
- تقدر بالأجازة أن تكون أكثر إبداعًا وابتكارًا ، لأنها هتوفر لك الوقت لتحديث وإعادة شحن خلايا الدماغ فتفكيرك هيكون أحسن لكن للأسف الأجازة بالنسبة لينا هو قضاء التعب في أمور تانية برا الشغل ودا غلط لأن الأجازة هو أنك ترتاح عشان تقدر تكون مبدع مع الأسبوع الجديد.
- الإجازة هتخليك أكثر سعادة، حيث كشفت دراسة حديثة أن كل الأشخاص الذين حصلوا على إجازات هم أكثر سعادة من أولئك الذين لم يفعلوا وشك وقلبك بينوروا كدا بسبب تأثير الراحة والتنوع في نشاطاتك بين الشغل والحياة.
- الإجازة فرصة للاستمتاع بالحياة من منظور جديد سواء بقى خرجت فسحة أو رحت شاطئ أو زرت مكان جديد أو حتى قررت رؤية العالم من زاوية أخرى أتذكر لما كنت بشتغل بدون أجازات كنت مابشوفش الشمس وعرفت قيمة أنك تشوف الشروق والغروب الساعات الذهبية في حياتنا كل يوم.
- الأجازة بتقولك أمنح من وقتك لعلاقاتك الثمينة اللي في ظهرك وبيحبوك إذا عملت دا هتشوف أثر إيجابي كبير على نفسيتك ونفسية أعز الناس لقريبين منك وأسرتك.
الأجازة مش رفاهية دا احتياج.
الشغل مستمر لكن وقت الأجازة قصير.
صدقني بعد سنين من الشغل اكتشفت إن النجاح بالاستمرارية مش بالإجهاد وان القوة في التخطيط مش في العضلات وإن السعي إلى التوفيق يتطلب الموازنة بين العمل والحياة.
يومكم جميل يامعشر.
